ທ່ານ ຮອງຫົວໜ້າອົງການໄອຍະການປະຊາຊົນສູງສຸດ ພົບປະໂອ້ລົມ ພະນັກງານຫຼັກແຫຼ່ງ ອົງການໄອຍະການປະຊາຊົນພາກໃຕ້ ແລະ ແຂວງຈຳປາສັກ

ໃນຕອນເຊົ້າຂອງວັນທີ 3 ມິຖຸນາ 2026 ທີ່ນະຄອນປາກເຊ ທ່ານ ບຸນທັນ ບຸນທະວິໄລ ຮອງເລຂາຄະນະບໍລິຫານງານພັກ ຮອງຫົວໜ້າອົງການໄອຍະການປະຊາຊົນສູງສຸດ ພ້ອມຄະນະ ໄດ້ເຄື່ອນໄຫວຊຸກຍູ້ຊີ້ນຳວຽກງານໄອຍະການ ຢູ່ ແຂວງຈຳປາສັກ, ໂດຍມີ ທ່ານ ຂັນທະວິ ວິໄລສັກ ຫົວໜ້າອົງການໄອຍະການປະຊົນພາກໃຕ້, ທ່ານ ນາງ ບົວລຽນ ມະນີວົງ ຫົວໜ້າອົງການໄອຍະການປະຊາຊົນແຂວງຈໍາປາສັກ, ມີບັນດາຄະນະພັກ-ຄະນະນຳ, ພະນັກງານ-ລັດຖະກອນ ອົງການໄອຍະການປະຊາຊົນພາກໃຕ້, ອົງການໄອຍະການປະຊາຊົນແຂວງ, ອົງການໄອຍະການປະຊາຊົນເຂດ ແລະ ເຂດປະຈຳເມືອງ ເຂົ້າຮ່ວມ. ໃນວາລະດັ່ງກ່າວ ທ່ານ ຂັນທະວີ ວິໄລສັກ ຫົວໜ້າອົງການໄອຍະການປະຊາຊົນພາກໃຕ້ ໄດ້ຂຶ້ນລາຍງານວຽກງານການເຄື່ອນໄຫວຈັດຕັ້ງປະຕິບັດວຽກງານຮອບດ້ານ ແລະ ທິດທາງແຜນການ 6 ເດືອນທ້າຍປີ 2026 ຂອງອົງການໄອຍະການຍະການພາກ ແລະ ແຂວງ ໂດຍສັງເຂບ ເຊິ່ງທ່ານໄດ້ຍົກໃຫ້ເຫັນ ດ້ານອອ່ນ-ຂໍ້ຄົງຄ້າງ, ສາເຫດ ແລະ ບົດຮຽນທີ່ຖອດຖອນໄດ້ ແລະ ທິດທາງທີ່ຈະຕ້ອງເອົາໃຈໃສ່ປັບປຸງໃນຕໍ່ໜ້າ. ພ້ອມນັ້ນ, ບັນດາທ່ານທີ່ເຂົ້າຮ່ວມກໍຍັງໄດ້ຂຶ້ນແລກປ່ຽນປະກອບຄຳຄິດຄຳເຫັນ ກ່ຽວກັບວຽກງານວິຊາສະເພາະດ້ານວິຊາການ ລະຫວ່າງ ທ້ອງຖິ່ນດ້ວຍກັນ ແລະ ທ້ອງຖິ່ນກັບສູນກາງ ເພື່ອເປັນບົດຮຽນ ແລະ ທິດທາງ ໃນການປະຕິບັດໜ້າທີ່ວຽກງານຂອງຕົນໃນຕໍ່ໜ້າ. ໃນໂອກາດທີ່ມີຄວາມໝາຍຄວາມສຳຄັນນີ້ ທ່ານ ບຸນທັນ ບຸນທະວິໄລ ຮອງເລຂາຄະນະບໍລິຫານງານພັກ ຮອງຫົວໜ້າອົງການໄອຍະການປະຊາຊົນສູງສຸດ ໄດ້ສະແດງຄວາມຍ້ອງຍໍຊົມເຊີຍກ່ຽວກັບຜົນງານໃນການປະຕິບັດໜ້າທີ່ວຽກງານທີ່ມີຜົນສຳເລັດຫຼາຍດ້ານ. ພ້ອມທັງ ໄດ້ໂອ້ລົມ ແລະ ເນັ້ນໃຫ້ ສະມາຊິກພັກ-ພະນັກງານ ຂອງ ອົງການໄອຍະການປະຊາຊົນພາກໃຕ້, ອົງການໄອຍະການປະຊາຊົນແຂວງ, ອົງການໄອຍະການປະຊາຊົນເຂດ, ເຂດປະຈຳເມືອງ ຈົ່ງເຊີດຊູຄວາມຮັບຜິດຊອບຂອງຕົນໃນການເຮັດລ້ອນໜ້າທີ່, ຮັບໃຊ້ຊາດ, ຮັບໃຊ້ປະຊາຊົນດ້ວຍຄວາມບໍລິສຸດໃຈ, ເອົາໃຈໃສ່ສຶກສາອົບຮົມການເມືອງແນວຄິດ, ຄຸນທາດການເມືອງ, ຈັນຍາບັນ, ຈັນຍາທຳ, ລະບອບແບບແຜນວິທີການເຮັດວຽກ, ການພົບປະກັບປະຊາຊົນ, ສ້າງກົນໄກປະສານງານກັບພາກສ່ວນທີ່ກ່ຽວຂ້ອງ ໃນການຕິດຕາມກວດກາການປະຕິບັດກົດໝາຍ ແລະ ການສັ່ງຟ້ອງຂຶ້ນສານ. ນໍາເອົາເນື້ອໃນຈິດໃຈຊີ້ນໍາໃນຄັ້ງນີ້ ໄປຈັດຕັ້ງຜັນຂະຫຍາຍເຂົ້າສູ່ວຽກງານຂອງຕົນ ຢ່າງມີຜົນສໍາເລັດ, ພັດທະນາວຽກງານໄອຍະການປະຊາຊົນຕາມທິດກ້າວໜ້າ, ທັນສະໄໝ ແລະ ມີວິທະຍາສາດ.