ພິທີລົງນາມແຜນການຮ່ວມມື ລະຫວ່າງ ອົງການໄອຍະການປະຊາຊົນສູງສຸດ ແຫ່ງ ສປປ ລາວ ແລະ ອົງການໄອຍະການປະຊາຊົນສູງສຸດ ແຫ່ງ ສສ ຫວຽດນາມ ໃນໄລຍະປີ 2026-2028

ໃນວັນທີ 15 ກໍລະກົດ 2026 ໄດ້ຈັດພິທີລົງນາມແຜນການຮ່ວມມື ລະຫວ່າງ ອົງການໄອຍະການປະຊາຊົນສູງສຸດ ແຫ່ງ ສປປ ລາວ ແລະ ອົງການໄອຍະການປະຊາຊົນສູງສຸດ ແຫ່ງ ສສ ຫວຽດນາມ ໃນໄລຍະປີ 2026-2028, ຊຶ່ງໃຫ້ກຽດລົງນາມໂດຍ ສະຫາຍ ນາງ ລີວົງ ລາວລີ ກຳມະການສູນກາງພັກ ຫົວໜ້າອົງການໄອຍະການປະຊາຊົນສູງສຸດ ແຫ່ງ ສປປ ລາວ ແລະ ສະຫາຍ ຫງວຽນ ຮຸຍ ຕຽນ ກຳມະການສູນກາງພັກ ກອມມູນິດ ຫົວໜ້າອົງການໄອຍະການປະຊາຊົນສູງສຸດ ແຫ່ງ ສສ ຫວຽດນາມ. ແຜນການຮ່ວມມື ລະຫວ່າງ ອົງການໄອຍະການປະຊາຊົນສູງສຸດ ແຫ່ງ ສປປ ລາວ ແລະ ອົງການໄອຍະການປະຊາຊົນສູງສຸດ ແຫ່ງ ສສ ຫວຽດນາມ ໃນໄລຍະປີ 2026-2028 ປະກອບມີຫຼາຍກິດຈະກໍາ ເປັນຕົ້ນ ການຈັດກອງປະຊຸມພົບປະເພື່ອແລກປ່ຽນບົດຮຽນ ກ່ຽວກັບວຽກງານຄ້າຍຄຸມຂັງ-ດັດສ້າງ ແລະ ການຕິດຕາມກວດກາການປະຕິີບັດຄໍາຕັດສິນຂອງສານໃນຄະດີອາຍາ; ຄະນະຜູ້ແທນຂັ້ນສູງອົງການໄອຍະການປະຊາຊົນສູງສຸດ ແຫ່ງ ສປປ ລາວ ໄປຢ້ຽມຢາມ ແລະ ເຮັດວຽກເປັນທາງການຢູ່ ສສ ຫວຽດນາມ ໃນປີ 2027; ຄະນະຜູ້ແທນມະຫາວິທະຍາໄລ ໄອຍະການ ສາຂາ ນະຄອນໂຮ່ຈິມິງ, ສສ ຫວຽດນາມ ມາຢ້ຽມຢາມ ແລະ ເຮັດວຽກເປັນທາງການ ຢູ່ ສປປ ລາວ; ການແລກປ່ຽນບົດຮຽນ ກ່ຽວກັບວຽກງານຕິດຕາມກວດກາໃນການແກ້ໄຂຄະດີແພ່ງ ແລະ ການແລກປ່ຽນປະສົບການການກວດກາວຽກງານການປະຕິບັດກົດໝາຍ ຕິດພັນກັບການສະກັດກັ້ນ ແລະ ຕ້ານການສໍ້ລາດບັງຫຼວງ ລວມທັງຂະບວນການຕິດຕາມ, ຢຶດ ແລະ ຢຶດຊັບສິນແຫຼ່ງກຳເນີດການສໍ້ລາດບັງຫຼວງຈາກຕ່າງປະເທດ.