ຫົວໜ້າອົງການໄອຍະການປະຊາຊົນສູງສຸດ ຢ້ຽມຢາມ, ພົບປະເລຂາຄະນະບໍລິຫານງານພັກເມືອງງາ ແຂວງອຸດົມໄຊ

ໃນຕອນເຊົ້າຂອງວັນທີ 12 ພຶດສະພາ 2026, ທ່ານ ນາງ ລີວົງ ລາວລີ ກຳມະການສູນກາງພັກ ເລຂາຄະນະບໍລິຫານງານພັກ ຫົວໜ້າອົງການໄອຍະການປະຊາຊົນສູງສຸດ ພ້ອມດ້ວຍຄະນະ ໄດ້ເຂົ້າຢ້ຽມຢາມ, ພົບປະ ທ່ານ ໂອທິບ ຟອງປະດິດ ເລຂາຄະນະບໍລິຫານງານພັກເມືອງ, ສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງງາ ແຂວງອຸດົມໄຊ ພ້ອມທັງແຈ້ງຈຸດປະສົງ ຂອງການລົງເຄື່ອນໄຫວທ້ອງຖີ່ນໃນການລົງຕິດຕາມຊຸກຍູ້ວຽກງານ ຢູ່ ແຂວງອຸດົມໄຊ ໃຫ້ຊາບ ແລະ ພ້ອມທັງເຂົ້າຮ່ວມເປັນປະທານໃນພິທີປະກາດການແຕ່ງຕັ້ງພະນັກງານອົງການໄອຍະການປະຊາຊົນເຂດI ປະຈຳເມືອງງາ ແລະ ພິທີ ເປີດຫ້ອງການອົງການໄອຍະການປະຊາຊົນເຂດ I ປະຈຳເມືອງງາ ແຂວງອຸດົມໄຊ. ໃນໂອກາດດັ່ງກ່າວ ທ່ານ ໂອທິບ ຟອງປະດິດ ເລຂາຄະນະບໍລິຫານງານພັກເມືອງ, ສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງງາ ແຂວງອຸດົມໄຊ ໄດ້ສະແດງຄວາມຕ້ອນຮັບຢ່າງອົບອຸ່ນ ແລະ ຂອບໃຈຢ່າງສູງ ມາຍັງການນໍາອົງການໄອຍະການປະຊາຊົນສູງສຸດ ພ້ອມດ້ວຍຄະນະ ທີ່ໄດ້ມາຢ້ຽມຢາມ ແລະ ເຄື່ອນໄຫວວຽກງານຢ່າງໃກ້ຊິດຕິດແທດ ໃນຄັ້ງນີ້. ພ້ອມນັ້ນ, ທ່ານໄດ້ລາຍງານກ່ຽວກັບເມືອງ ແລະ ພື້ນຖານໂຄງລາງ, ວຽກງານຈຸດສຸມ ຂອງເມືອງງາໃຫ້ຄະນະນໍາອົງການໄອຍະການປະຊາຊົນສູງສຸດຊາບ ແລະ ຈະສົ່ງເສີມ, ຊຸກຍູ້ວຽກງານໃນຂົງເຂດອ້ອມຂ້າງເພື່ອເປັນກຳລັງແຮງໃນການປະຕິບັດໜ້າທີ່ ຂອງອົງການໄອຍະການປະຊາຊົນເຂດ I ປະຈຳເມືອງງາ ແຂວງອຸດົມໄຊ ເພື່ອເປັນການຕິດຕາມກວດກາການເຄົາລົບ, ປະຕິບັດກົດໝາຍ ແລະ ສັ່ງຟ້ອງຜູ້ຖືກຫາຂຶ້ນສານຕາມກົດໝາຍຢ່າງສັກສິດ.